logotype

 

 

24. Adventsfenster

Zom Abschloss vo eusem Adventskaländer wönscht die ganz Blaureng Riffig Schar wonderschöni Wiehnachte! Mer hoffed ehr fiired alli schön met euchne liebste ond freued eus druf, alli weder z‘gse im neue Johr! 

 

Bis bald im Wald - Üchi Blaureng Riffig Schar

23. Adventsfenster

Zom 23. Törli geds üses gsamte Leitigsteam z'fiire! Done es Beld vo es paar chic agleite Leiterinne ade letztwöchige Jublagala wo - by the way - en völlige Erfolg gse esch!

22. Adventsfenster

Zom Abronde vo eusem Adväntskaländer no die legst Person fo eusem supertolle Leitigsteam: die neugierig Neddy, alias üsi Präses, esch sit 12 Johr ide Jubla tätig ond mer hend s‘Glöck, dass sie ez im zwoite Johr be eus debi esch. Ehres lieblings Jubla-Ässe send Fajitas ond «Das alte Haus von Rocky Docky» esch ehres Lieblingslied. Am liebste hed d'Neddy de Sommer ond sie schafft als Pastoralassistäntin. Dementsprächend fendet mer sie, wenn ned im Blaureng, ide Pfarrei. D'Neddy muess d'Wält gseh ha ond sie cha ned gnueg becho vo Tennis. De Neddy chömmer ned gnueg Danke säge för alles, wo sie för eus macht. Mer chönd emmer uf sie zue go ond sie ged emmer s Beste zom eus hälfe ond sie schaffts emmer, eusi heisse Diskussione met ehrne rationale Wort ufe Bode z‘brenge - merci!

21. Adventsfenster

Die allerchlinsti Aline esch setem 2002 im Blaureng - jo genau, 15 Johr! Sie esch die Ältischt i eusem Leitigsteam ond das met 392 Täg Abstand zo de Zwoitältiste - jo genau, öber 1 Johr! Sit dem Sommer hed sie kei Groppe meh. am Blaureng fendet sie s‘beste: gemeinsam onvergässlechi Erläbnis z‘schaffe ond s‘beste Ässe esch för sie emmer s‘Frässpäckli vom Mami ondem Papi im Lager (dass das niemert andersch gnennt hed). «Breathe Easy» vo Blue esch ehres Lieblingslied ond zuglich dä Hit för jedi Abwäschparty. Ehri Lieblingsjohreszit moss de farberiichi Herbst. D’Aline schaffet als Fachfrau Gsondheit ond sett mer sie ned im Blaureng fende, denn im Läsesässel metme spannende Buech ondnere feine Tasse Tee (vorallem im Wenter). Sie muess onbedengt versteckti Wenkel vo dere Wält entdecke ond was sie vell seid: «Ech weiss doch au ned»

 20. Adventsfenster

Die könstlerischonbegabti Katy esch sit de zwoite Klass im Blaureng. Sie esch schöni 20 Johr jong ond leited d’Groppe Soturis alias Böffelbande. Ade Jubla fendet sie s’Beste, dass sie wie en zwoiti Familie esch (wo mer glaub alli sofort zuestemmed) ond vo dere Familie werd sie am liebste bechochet met Ghacktem met Hörnli ond Öpfelmues (zom met de Händ ässe). Ehres Lieblingslied esch «Warn Dem» vom Gentleman ond ehri lieblings Johreszit esch fix de Wenter. I dere Wentersaison schaffet sie in Whistler (in Kanada) ond abem Sommer 2018 träted sie es Vorstudiepraktikom för Agronomie a de Hochschuel ah. Sett sie ned im Blaureng sie, denn esch sie im Wenter die Bärge oder am Käffele die Stadt ond im Sommer gsehd mer sie denn prinzipiell ned, wells vell z’heiss esch för sie zom use go ond sie denn ame hässig esch dasses ned schneit. Das, wo sie im Läbe mol moss erreicht ha esch, so vell schön gmoschterti Socke z’besetze, dass sie nie meh moss öödi schwarzi 0815 Socke alegge. D’Katy cha nie gnueg öbercho vo Guetnachtgschechtli im Sommerlager, Wenter, Schnee, schöne Socke, Möuchschuum uf de heisse Ovi ond neme Lagerfüürobe. Wenns om d’Katy god esch öppis, wo sie definitiv z’vell seid: «Oder so…»

 

19. Adventsfenster

Die charaktervoll Caroline ech sit 2002 im Blaureng. Sie esch 23i ond sit dem Sommer leitet sie kei Groppe meh, esch aber trotzdem no debi! För sie esch s’Beste ade Jubla eidütig s’Bändeli-Chnöpfe, s’Zämesii, s’ässe ond s’Omedräckle so, wie mer wett. Am liebste esst sie d’Jubla-Fotzelschnitte ond es altbekannts Lied namens «Schnudifudi» esch ehres Lieblingslied. Im Herbst fühlt sech d’Caro am wohlste im Johr. Momentan studiert sie ade HSLU soziali Arbet. Sobald sie mol ned im Blaureng uffendbar esch, esch sie secher ergendwo onderwägs. Was d’Caro onbedengt mol moss gmacht ha, esch en Wältreis. Chips send das, vo dem sie nie gnueg chan becho ond wenns öppis ged, wo d’Caro vell seid denn eschs: «Joooooo aber…»

 
 

18. Adventsfenster

Die nett Natalie esch sit de erste Klass im Blaureng, esch jetzt jongi 17 Johr alt ond leitet d'Groppe namens Lohataonas. Was sie för s'Beste ade Jubla halted: s'zämme si (juhuu Grondsatz) ond s'lostig ha. Zuesätzlech zo dem esst sie am liebste huusgmachts Cinque Pi vom Blaureng. Ehres Lieblingslied esch «Angelina» vo Dabu Fantastic. D'Natalie macht en Lehr als Zeichneri Fachrechtig Ingenieur ond wenn mer sie ned im Blaureng fendet, denn esch sie entweder am Bädele im Hallebad oder am Popcorn schmause im Kino. Lehre Surfe esch öppis, wo sie onbdengt i ehrem Läbe muess gmacht ha. Sie cha ned gnueg becho vo Ässe ond was sie am meiste seid: «No way!»

 

 17. Adventsfenster

Die langmüetig (emmer schön met de Rueh, he…) Lea esch sit sie 7 Johr alt esch, also metlerwile 17 Johr lang im Blaureng. Das heisst so vell wie, sie esch jetzt 21gi ond Leiterin vo de Bodigers. S’Beste för sie am Blaureng Riffig esch: ongeniert die ganz ziit met de Gommistefel chönne omezlaufe (das esch werkli öppis, wo d’Lea meh als gärn macht) ond generell esst hed sie im Blaureng am liebste s’Zmorge natüerlech us dem Grond, wells de am wenigste abzwäsche ged, well mer s’M...ässer jo grondsätzlech vom Nochber chan uslehne. Ufgrond vo ehrere Groppe esch ehre Lieblingssong klar: de Bodigersong! Ond ehri Lieblingsjohreszit: jetzt! Aso denn, wenns Schnee hed ond d’Vor-Wiehnachts-Ziit esch, de esch för sie nämlech alles guet. Zorzit esch d’Lea im Rahme voneme Erasmus-Semester in Grenoble, Frankrich (s’werd öbrigens langsam Zit, dass wedermol zrogg chonsch!) ond söst esch sie Studäntin ade PH z’Lozärn. Wenn d’Lea ned im Blaureng uffendbar esch, denn esch sie ergendwo onterwägs metem Velo. Was sie im Läbe mol moss gmacht ha esch: s’Nordliecht z’gse. Sie cha ned gnueg becho vo Pullis, well mer Pullis emmer brucht. Ond Pullis send bequem. D’Lea seid vell (well bekanntlech probiere öber studiere god): «Looos!»

 

16. Adventsfenster

Die charmant Caro esch sit de zwoite Primar, also 11 Johr im Blaureng, sie esch sech aber ned so secher be dere Ussag. Sie esch 19ni ond esch Leiteri bide Groppe Ohana. Ade Jubla hed sie am liebste all die Lüt (sowohl LeiterInne, als au Chend) ond ehres Lieblingsblaurengässe esch Schoggifondue. D’Caro lost am liebste «La Tortura» vo de Shakira ond de Sommer esch ehri Lieblingsjohreszit. Wenn sie mol ned im Blaureng esch, denn secher öberall dete, wos sonnig ond warm esch. Momentan macht sie es Zwöschejohr (moss mer fast noch 6 Johr Kanti) ond schaffet zor zit als Chällnerin im Bahnhöfli (falls ehr mol vonere charmante Person wörded welle bedient wärde – ab is Bahnhöfli). D’Caro moss i ehrem Läbe mol en Wältreis gmacht ha ond vo was cha ächt sie ned gnueg öbercho? Vermuetlech Musig ond was sie am meiste seid esch: «Voll!»

15. Adventsfenster

Die sensationellscherzhaftispassigsengendi Svenja esch 20gi ond leited d’Groppe Bodigers. S’Beste ade Jubla send för sie aaabsolut ächti Lebensfreu(n)de ond de Fakt, dass jede willkomme esch ond glich behandelt wird (wedermol en Applaus a eusi Jubla-Vorsätz). För d’Svenja geds nüd bessers z’Ässe, als en guete, reichhaltige Brunch im SoLa met sälbergmachte Schoggigepfeli (do bechond mer grad Lost druf bem Läse). Die Svenja ehres Lieblingslied esch «Hero» vo Family Of The Year ond die best Zit vom Johr esch för sie d’Abentüürzit. Sie studiert in Bärn BWL, zäme met Geografie ond nachhaltiger Entwecklig. Sie fendet mer, wenn ned im Blaureng, denn onter nere warme Duschi inere Bärghötte nochneme Abentüür. Was d’Svenja mol moss gmacht ha esch, s’Totemügerli oswändig glehrt z’ha ond vo Zocker, blaue Sache ond Vanille cha sie ned gnueg becho. Bede Svenja geds tatsächlech nüd, wo sie zvell seid, aber was mer vo ehre definitiv chan säge esch, dass sie gärn ab ond zue (oder au eher vell) s’Harry Potter Theme pfifft.

14. Adventsfenster

Die lachliebendi Lorena, jedoch im Blaureng d’Lona, esch sit 2007 debi. Jetzt esch sie 17ni ond leitet d’Groppe Koleschanka. Was sie am liebste hed a de Jubla: die onglaublech(e) Lebensfreu(n)de, emmer weder chli Chend chönne si ond s’Lagerfüür im SoLa. Jubla-Cinque Pi esch för sie am feinste ond am liebste lost sie «Comfortable» vom Lauv. D’Lona liebt nüüd meh als de Sommer (ossert Volleyball natüerlech) ond im Momänt esch sie im letzte Johr ade Kanti Rüssbüehl. Sett mer sie ned im Blaureng fende, stod sie gamz secher die Halle am Volleyball spelle, so wie öppe jede Tag. Was sie onbedengt mol moss gmacht ha, esch, die Trope vomene 10m höche Wasserfall abezgompe. Vo Volleyball, Lache, salzigem Züg (hauptsächlech Pommes Frites) ond natüerlech Volleyball cha sie nie gnueg ha. Ond ohni Wetz, «ohni Wetz» seid d’Lona eifach z’vell.

 13. Adventsfenster

Die onterschätzti Olivia (onterschätzt, well niemert glaubt, dass sies schafft, zwoi Woche s’Materialzelt im Lager ufgrumt z’bhalte – hed by the way ned klappt, Olivia! – nei Scherz, mer schätzed, dass du so för das brönnsch ond jo, sie gsehd genau us wie d‘Lisa) esch sit 2007 im Blaureng ond esch 17ni. Sie esch Leiterin bide Groppe Bodigers. S’Beste ade Jubla?: S’Schoggispeli ond Lagerfürsengete met Läbensfrönde. Am liebste esst sie die Jubla Fotzelschnette ond ehre Lieblingssong esch… *trommelwirbel* de Liebessong. De Sommer esch ehri Lieblingsjohreszit, wobi sie de Räst au toll fendet, ossert s’esch chalt ond es scheffet debi. Sie esch im Momänt ide 5. Klass ade Kanti Rüssbüehl ond wenn sie ned im Blaureng esch, denn im Bett oder im Wälsche am Französisch schnörrele. D’Olivia moss einisch de Wiehnachtsma bim Gschänkli brenge verwötsche. Sie cha ned gnueg becho vo ehrem gliebte Hipstersäckli ond Chläbris vo de Lona ehrem Mami. Was d’Olivia am meiste seid: «Ey leute aber ohni Wetz!»

 

12. Adventsfenster:

Die detailverliebti Denise esch sit de 2. Klass, aso 10 Johr im Blaureng. Sie esch 16ni ond d’Groppeleiterin vo de Gommibärli. Was sie am meiste liebt ade Jubla send die tolle Lüüt ond natüerlech, dass mer Sache daf/chan mache wo mer normalerwis ned dörft (för öppis esch d’Jubla jo do). Am liebste hed sie Jubla-Gritibänz, frösch usere Groppestond entstande ond ehres Lieblingslied esch «Vampir» vo Lo & Leduc. Ehri lieblings Johreszit esch de Früehlig. Momentan god d’Denise ad Kanti Alpenquai ond esch im 5te Johr. Emmer wenn sie ned im Blaureng esch, erläbt sie Abentüür ond passend zo dem moss sie i ehrem Läbe onbedengt mol die chinesisch Muur abglaufe si. D’Denise cha ned gnueg öbercho vom Lache, sodass eim de Buch wehtuet ond am meiste seid sie: «Blööödsiiinnn!»

11. Adventsfenster

Die liecht dörenandnigi Lisa (jo rechtig, sie gsehd genau glich us wie d’Olivia, ehr werdeds de no gse) esch sit de zwoite Klass im Blaureng. Sie esch 17ni ond leitet d’Groppe namens Ohanas. För sie esch s’beste ade Jubla d’Stemmig, die tolle Lüüt ond natüerlech sie (zitiert). Ehres Lieblingsässe vom Blaureng send Älplermagarone oder de altbekannti American Hotdog. «Du» vom Nemo esch ehres Lieblingslied ond de Sommer mag sie am meiste wägem Sommerlager ond de Herbst wäg ehrem Gebortstag. Sie schaffet als Schüelerin die 5. Klass ade Kanti Rüssbüehl ond zuesätzlech esch sie professionelli Fuulänzerin. Sobald sie mol ned im Blaureng esch, denn öberall det, wos Freud, Liebi ond en gmüetlechi Stemmig hed. Einisch i ehrem Läbe moss sie es Raubtier gstreichlet ha. Vo Schoggi, Chääs ond coole Socke cha sie ned gnueg öbercho ond werklech, d’Lisa frogt emmer: «Chasch mer chorz hälfe, ech chan mech ned entscheide!» (ächt jetzt, be allem!)

10. Adventsfenster

Die einfühlsami Ella esch sit 2013 (zom glöck!) weder im Blaureng!!! Vorher esch sie sit 2007 schomol debi gse, hed den aber us ergendwelchne Grönd e chorzi Pause mösse ilegge, bis sie schlossändlech weder zo eus gfonde hed – juhuuu!! Sie esch 18ni ond leitet d’Groppe Schläckmüüler. För sie esch s’beste a de Jubla, dass alles und jede dezuepasst und gschätzt wird (echli à la Grondsätz vo de Jubla). Ehres Lieblingsjublaässe esch Schoggibanane und Spaghetti ond am liebste lost sie She’s Always A Woman To Me vom Billy Joel. D’Ella liebt alli Johreszite meega, aber grondsätzlech hed sie lieber warm als chalt. Sie bsuecht d’Gsondheitsmittelschuel die Lozärn ond wemmer sie im Blaureng ned fendet, denn i ehrem Bett am läse oder am ässe. Was sie secher mol moss mache i ehrem Läbe esch so vell vo de Wält gse z’ha wie möglech ond drufue no öppis guets för d’Wält z’mache. D’Ella cha eifach ned gnueg öbercho vo ehrne Harry Potter Büecher ond was sie am meiste seid esch: «Jo äbe gsehsch…» (ond das, well sie echli eini esch, wo emmer moss rächt ha) 

9. Adventsfenster

Die lockerflockig Lorena alias de zwoit Teil vo eusem super Scharleiterinne-Duo esch sit de 2. Klass, i ehrem Fall 2004 im Blaureng. Damals esch sie 7ni gse ond höt wird sie 21! A dere Stell: alles gueti wönscht der de ganz Blaureng Riffig, liebi Lorena! Zrogg zom Thema: d’Lori leited d’Groppe Soturis, au Büffelbande gnennt ond was sie am liebste ade Jubla hed send d’Läbensfreu(n)de ond s’zwoi Woche lang dräckig si im Lager (wer liebt das ned…?). RaclettöfAli-Pizza (werom öfAli weiss niemert so genau) esst sie am liebste ond ehres liebste Lied esch «It Is Love» vo Pedestrians. De Früehling hed sie am meiste gärn ond momentan god sie ad PH z’Lozärn. D’Lori fendet mer, sett sie mol ned im Blaureng si, im Kino, wo sie au schaffet. Ehres Läbensziel esches, einisch gaaanz ganz lang go reise, ond das, obwohl sie eus bestemmt mega wörd vermesse. Sie cha ned gnueg vo kuschelige Sache becho ond was mer sie am hüfigste ghört säge esch: «Jo voll!»

 

 8. Adventsfenster

Am 8. Dezämber gods witer met de Yael! D’yolo Yael esch sit de zwoite Klass im Blaureng. Jetzt esch sie 16ni ond Groppeleiterin vo de Schläckmüüler (wo au sie bestens änepasst). Die schöne Momänt met ganz tolle Lüt, au Lebensfreunde gnennt, fendet sie am Beste a de Jubla. D’Yael esst am liebste Älplermagarone ond ehres Lieblingslied, wer hätts andersch dänkt, esch euse Blaureng Riffig Song. Sie hed am liebste de Herbst ond momentan god sie i die 2. Klass vom Chorzzitgymnasium ade Kanti Musegg. Esch sie mol ned im Blaureng, spellt sie wohrschinlech Volleyball. Öppis, wo be ehre z’oberst uf de To-Do-List vo ehrem Läbe stod, esch, en Wältreis z’mache. Niemols werd sie vo Ässe gnueg becho ond was sie am meiste seid esch: «wetzig» 

 

7. Adventsfenster

Die dorstigi Debie, au Tschabi gnennt ond ei Teil vo eusem super Scharleiterinne-Duo, esch doch tatsächlech sit Tag 1 im Blaureng! Sie esch 19ni, mängisch au 20i ond leitet die neu Groppe namens Gommibärli. För sie esch s’Beste ade Jubla definitiv s’Sommerlager ond det esst sie am allerliebste Fajitas. Ehres Lieblingslied heisst «Cha nüt deför» vo Phenomden ond am liebste hed sie de Früehlig. D’Debie studiert ade Uni Wertschaft ond wenn sie ned im Blaureng esch, befendet sie sech meistens, ganz secher z’Lozärn. Onbedengt wott sie mol Fallschirmspringe ond das, vo dem sie ned gnueg cha öbercho, esch Schoggi. D’Debie seid am hüüfigste: «hä?», so wies sogar au uf ehrem schöne Stirnband droffe stod.

 

6. Adventsfenster

Die natüerlech nätti Nadine esch sit 2004 im Blaureng, jetzt 20i ond d’Leiterin vo de Frozen-Fourmies. För sie esch s’Beste am Blaureng dass mer Erennerige sammlet, wo mer niemeh vergesst. Ehres Lieblings Blaureng-Ässe esch Cinque Pi ond am liebste lost sie «Thunder» vo de Band Imagine Dragons. D’Nadine liebt de Herbst ond studiert momentan als diplomierti Pflegefachfrau. Wenn sie ned im Blaureng esch, de spellt sie Volleyball ond was sie secher mol moss gmacht ha esch uf d’Galapagos Insle z’go. D’Nadine chan niiee gnueg Zit met ehrne Frönde verbrenge.

5. Adventsfenster

Die chaotisch Carla esch sit 2006 im Blaureng. Jetzt esch sie 18i ond leitet d’Groppe Koleschanka. Ehres Liebste a de Jubla send för sie die velle Lebensfrönde wo mer öber d’Johr dezuegwönnt. Am Feinste fendet sie d’Fotzelschnitte vom Blauring ond ehres Lieblingslied esch «I See Fire» vom Ed Sheeran. De Sommer esch ehri lieblings Johreszit (hauptsächlech wägem SoLa) ond im Momänt esch sie a de Fachmittelschuel z’Lozärn. Solang sie ned im Blaureng uffendbar esch, befendet sie sech ergendwo onterwägs imene Bus. D’Nordliechter muess d’Carla onbedengt mol gse ha ond sie cha nie gnueg vo Schoggi, Musig, Star Wars oder Schlof becho. Obwohl d’Carla en Brölleträgerin esch ghöremer sie trotzdem emmer säge: «Man ech chas ned läse!»

4. Adventsfenster

Die munter Meret esch sit 2008 im Blaureng ond ez esch sie doch scho 17ni. Als Leiterin vo de Lohataonas fendet sie all die supertolle, megahammerige Lüüt im Blaureng am beste. Älplermagrone esst sie am liebste, wenns us de Jublachochi chömed ond «Dusk Till Dawn» vom Zayn ond de Sia esch ehres Lieblingslied. Onterem Johr fendet sies am Beste wenns warm esch. D’Meret esch im letzte Johr (zom Glöck) ade Kanti Rüssbüehl ond wemmer sie ned im Blaureng fendet, denn secher dete, wos lostig esch (aso emmer det wo sie esch, wie sie’s i dem Fall wörd säge). Uf jede Fall moss d’Meret mol d’Wält entdeckt ha ond vo Schoggi ond ehrne Lieblingsmönsche cha sie ned gnueg öbercho. Am liebste, ond am hüüfigste seid sie «Kolläg» was so vell wie «was lauft?!» i de Sproch vo ehrere Klass heisst (werom au emmer…)

3. Adventsfenster

Die nöchst i eusere Vorstelligsrondi esch die niemehprinzeguetzliässendi Noëlle. Sie esch sit 14 Johr im Blaureng. 21i esch sie jetzt ond Groppeleiterin vo de Lohataonas. Alles wo met Dräck ond lache ztue hed esch för sie s’Beste ade Jubla ond Schlangebrot esst sie am liebste. Im Wenter hed sie lieber de Sommer ond im Sommer lieber de Wenter (was ja au völlig Senn macht) ond för es Lieblingslied esch ehre Musiggschmack zu abenand, wie sie gärn seid. Momentan probiert sie Germanistik ond Philosophie z’studiere ond wenn sie mol ned im Blaureng esch, fendet mer sie ufem Velo am omecruise. D’Noëlle wett uf jede Fall mol es tolls Buech gschrebe ha, wo secher öpper wott läse, demet sie mendestens i eim Mönsch sis Läbe es betzeli besser cha mache (zitiert). Vo ehrem Markezeiche, de onglaublech tolle Gletzersocke ond Kaffi cha sie ned gnueg öbercho. Was sie am meiste seid esch: ohni wetz/abenand!

2. Adventsfenster

Die kommunikativi Killy esch sit de zwoite Klass im Blaureng. Met ehrne (ned so erwachsene) 18 Johr leited sie d’Groppe Koleschanka. S’Beste ade Jubla esch för sie de riiiiesig Spass, wo mer eifach emmer hed. Am liebste esst sie d’Jubla-Spaghetti ond ehres Lieblingslied esch «Du» vom Nemo. Die best Johreszit esch för sie de Sommer ond zor Zit macht sie en Usbeldig als Fachfrau Gsondheit. Wenn sie mol ned im Blaureng esch, fendet mer sie im Ässensschrank (hemmer au scho erläbt) ond was sie secher mol wett gmacht ha esch elleige z’wohne, öbs klappt, do dröber semmer eus noni so secher. Was d’Killy vell zvell seid esch: hör uf!

1. Adventsfenster

Tag numero 1, mer fönd ah met de nätte Nina! Die nätti Nina esch sit de erste Klass im Blaureng ond jetzt jongi 16 Johr alt. Leiterin esch sie bide Schläckmüüler (wo sie super änepasst) ond för sie esch s’Beste ade Jubla, dass mer alli wie en Familie vo chli bes gross send, wo zäme die schönste Erläbnis hend. Ehres Lieblingsässe vode Jubla send eidütig Spaghetti (Cookies liebt sie au) ond ehri Lieblingslieder send d’Jubla-Lieder. Im Herbst fühlt sie sech währendem Schaffe als Fachfrau Gsondheit am wohlste ond wenn sie mol ned im Blaureng esch, fendet mer sie die Volleyhalle. Was d’Nina i ehrem Läbe secher mol wett gmacht ha esch uf Neuseeland z’go. Vo Schoggi cha sie ned gnueg becho ond well sie alles so toll fendet, seid sie am meiste: «öööh!»

 

 

 

2019  Blauring Riffig  globbers joomla templates